الراجحي يوضح حقيقة بيع منجم السكري
قال احمد الراجحي خبير التعدين والاقتصاد تعليقا علي الخبر الخاص بالاستحواذ على شركة سنتامين مالكة حق امتياز منجم السكري أن هناك كمية ادعاء و خلط للحقائق و جهل قد يكون احيانا متعمد من جانب ناس كتير لمجرد ركوب التريند او لتصفية حسابات سياسية.
واضاف الراجحي علي صفحته بموقع التواصل الاجتماعي الفيس بوك أن ما تداولته المواقع والصحف اليوم ليس له ادني علاقة بموضوع النهاردة
وان جورج برنارد شو كان عنده حق لما قال نصف المعرفة أكثر خطورة من الجهل
وتساءل هل منجم السكري او شركة سنتامين اتباعوا لشركة جديدة ؟ يعنى كان المالك س أصبح المالك ص ؟
الإجابة. لا .. كلمة بيع لا تنطبق على الحالة دى تماما
استحواذ معناه ان شركة سنتامين اللى اسسها الجيولوجي سامي الراجحي بداية السبعينات فى استراليا تم الاستحواذ على اسهمها من جانب شركة انجلو جولد اشانتي
بمعنى ان المساهمين فى سنتامين أصبحوا مساهمين فى كيان جديد اكبر اسمه انجلو جولد اشانتى مع مساهمينه الأصليين
لكن مباعوش شركتهم و اخدوا مكانها فلوس
و بالتالي أصول و امتيازات سنتامين انتقلت للكيان ده
فلما ييجي عبقري زمانه يعلق على الخبر فيقول " كانت الحكومة تعمل اكتتاب و الشعب يشتري المنجم بدل ما يروح للخواجات "
يبقى الحل معاه ايه ؟ و نرد عليه بايه؟
المنجم امتياز لشركة. غير قابل للبيع كأصل و محدش قالك ان الشركة مزنوقة فى فلوس و مستنياك تساعدها
ولا المنجم اتباع مقابل فلوس ولا الشركة اتباعت مقابل فلوس . لكن أسهم مقابل اسهم و علاوة نقدية للمساهمين
و الحكومة مش طرف اساسا فى العملية ولا ليها فيها خير او شر
مثال : . ابيع عربيتي يعنى انقل ملكيتها لشخص جديد و اخد فلوسي و اروح . لكن حد يستحوذ على عربيتي معناها انى دخلت بيها شريك فى شركة ليموزين
اظن كده واضحة؟
طيب هى الحالة دى اول مرة تحصل؟
الحقيقه برضه لا .. لان لو اى حد من اللى بيفتي بغير علم تغب نفسه و قرأ الاتفاقيه اللى بقانون رقم ٢٢٢ سنة ٩٤
يعنى من ٣٠ سنه
هيكتشف ان الامتياز كان من نصيب شركة اسمها الفرعونية لمناجم الذهب مملوكة بالكامل برضه لسامي الراجحي و الاتفاقية بتنص على :
ان الأرباح ( اللى هى الايرادات - مصاريف التشغيل ) تقتسم مناصفة بين الفرعونية و بين الحكومة المصرية بنسبه ٥٠ % لكل طرف + ٣ % من إجمالي المبيعات برضه تروح للحكومة تحت مسمى ضريبة اتاوة ( هى اسمها فى القانون كده ملهاش علاقة باتاوة حسونة السبع و التوت و النبوت يعني )
و على فكرة أسبوعيا كل الصحافه فى مصر بتنقل و بالأرقام. مبيعات المنجم و أرقام الأرباح و نسبة الدولة اللى استلمتها من الشركة و آخرها كان امبارح بس
بس فيه كتير بيتعمدوا يتجاهلوا ده و يدعوا بالكذب ان فيه تغييب او إخفاء للمعلومات الخاصة بنتايج أعمال المنجم و ببعتمدوا على ان محدش بيقرا و نص اللى بيقروا مبيفهموش اصلا اللى قروه
المهم .. انه بعد كده سنتامين المدرجة على بورصة لندن و من مكونات مؤشر الفوتسي ٢٥٠ العالمي ( استحوذت ) على الشركة الفرعونية
و رغم ان مالك الشركتين هو نفس الشخص . لكن ده فى مجال الأعمال على مستوي العالم حاجة بتحصل كل يوم . مش بدعة يعني
و النهاردة ده تانى استحواذ يحصل
هو الفرق ان وقتها مكانش فيه سوشيال ميديا و كل من هب و دب يفتي و يتهم
طيب هو استحواذ النهاردة ايه تأثيره على المنجم و اتفاقيته و اصوله و نصيب الدولة فى ارباحه؟
الإجابة : لا شيء
نصيب الدوله فى الأرباح و الضرايب هتاخده زى ما بتاخده على مدي ١٤ سنه فاتوا من بدء الإنتاج
لان الاندماج او الاستحواذ ( و فيه فرق بين مصطلح الاندماج و الاستحواذ على فكرة لكن ده مش موضوعنا دلوقت ) ملوش تأثير على التزامات اى طرف من الاطراف المندمجة. إضافة لان الكيان القانوني للشركة سيظل موجود. الجديد انها هتكون شركة تابعة داخل شركة قابضة اكبر
و على فكرة سنتامين عندها امتيازات مناجم تانية فى أفريقيا و ينطبق عليها اللى ينطبق على السكري فى مصر
لكن الحقيقة انا مش متأكد اذا كانت الشعوب هناك عندهم ناس زى اللى بشوفهم هنا محتاجين حد يأكد لهم ان جغرافيا غير فوتوغرافيا و فوتوغرافيا غير جغرافيا.. ولا لا
عموما .
انا وضحت ده للى عاوز يفهم .. أما اللى عاوز يكمل لطم و نواح فبقول له
